ᕿᑭᖅᑕᕐᔪᐊᖅ ᐃᑎᔪᖅ ᑕᕆᐅᕐᒥ ᑭᓴᕐᕕᒃ

ᓴᓇᔭᐅᔪᖅ ᑭᓱᓕᕆᕙ

ᐊᑐᖅᓯᔪᓐᓇᖅᓯᒍᑎᒃ ᑕᕆᐅᕐᒥ ᓇᑉᐸᖅᓯᒪᔪᓂᒃ ᐊᒃᑐᐃᓂᖃᓪᓚᑖᕐᓂᐊᖅᑐᑦ ᑕᒪᐃᓐᓂᒃ ᐃᓄᖕᓂᒃ, ᐱᔅᓂᔅ ᐊᒻᒪᓗ ᑲᒻᐸᓂ ᓄᓇᕗᒻᒥ. ᓄᓇᕗᑦ ᐱᑕᖃᓐᖏᓗᐊᕐᓂᖓᓄᑦ ᑕᕆᐅᕐᒥ ᓇᑉᐸᕆᐊᓕᖕᓂᒃ ᐊᖏᔪᒥᒃ ᐊᔪᖅᑎᑦᑎᓕᖅᐸᒃᑐᖅ ᐱᔭᕆᐊᒃᓴᖅ ᐃᑲᔫᑎᒃᓴᓂᒃ, ᐱᑕᖃᓐᖏᑦᑐᑦ ᐃᑲᔫᑎᒐᔭᖅᑐᑦ ᒪᑭᒪᔾᔪᑎᓄᑦ ᑮᓇᐅᔭᓕᐅᕈᑎᓄᑦ ᐊᔪᖅᓴᓐᖏᑦᑎᐊᓕᕐᓗᑎᒃ ᐊᒻᒪᓗ ᐅᑭᐅᖅᑕᖅᑐᖅ ᓄᓇᒋᔭᐅᔪᓐᓇᕐᓂᖓᓄᑦ, ᐊᒻᒪᓗ ᓴᐳᒻᒥᔾᔪᑎᒃᓴᖅᑕᖃᓐᖏᑦᑐᖅ ᐊᒻᒪᓗ ᖃᐅᔨᒪᔭᐅᑦᑎᐊᓕᕈᑎᒃᓴᓂᒃ ᓄᓇᕗᑦ ᑲᔾᔮᕐᓇᑑᓂᖓᓂ ᐊᒻᒪᓗ ᓄᓇᒥᐅᑕᖏᓐᓂᒃ.

ᕼᐊᒻᓚᒃᑯᑦ ᕿᑭᖅᑕᕐᔪᐊᒥ, ᐃᑲᔪᖅᑕᐅᓪᓗᑎᒃ ᕿᑭᖅᑖᓗᒃ ᑯᐊᐳᕆᓴᓐ ᐊᒻᒪᓗ ᕿᑭᖅᑖᓗᑦ ᓇᖕᒥᓂᖁᑎᓕᖕᓄᑦ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕆᓴᓐ, ᐅᖃᐅᓯᕆᕙᒃᑕᖏᑦ ᐱᔾᔪᑎᒋᓪᓗᒍ ᐃᑎᔪᒥ ᑕᕆᐅᕐᒥ ᑭᓴᕐᕕᖃᕆᐊᖃᕐᓂᖓᓂ ᓄᓇᓕᖕᓂ. ᐅᓇ ᑭᓴᕐᕕᒃ ᕿᑭᖅᑕᕐᔪᐊᕐᒥ ᐃᑲᔫᑎᓂᐊᖅᑐᖅ ᑭᖕᖒᒪᒋᔭᖏᓐᓄᑦ ᐅᑭᐅᖅᑕᖅᑐᒥ ᑕᕆᐅᕐᒥᑦ ᑕᐅᖅᓰᕕᐅᔪᖅ ᓱᓪᓗᐊᓗᖕᒧᑦ ᐱᓗᐊᖅᑐᒥᒃ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᒪᑐᐃᖅᐸᑦ ᐊᒻᒪᓗ ᐅᑭᐅᖅᑕᖅᑐᖅ ᐅᒥᐊᖅᑐᕐᕕᐅᓂᖅᓴᐅᓕᕐᓗᓂ. ᑭᓴᕐᕕᒃ ᐊᑐᖅᑕᐅᓂᖅᓴᐅᓂᐊᓕᖅᑐᑦ ᐅᒥᐊᖏᓐᓂᑦ ᐊᑦᑕᕐᓇᖅᑐᒦᑎᑦᑎᓐᖏᓪᓗᓂ ᐊᒻᒪᓗ ᐱᔨᑦᑎᕋᕐᕕᐅᓗᓂ ᐊᒻᒪᓗ ᐃᑲᔪᕐᓗᓂ ᐱᕈᕐᓂᖓᓄ ᐅᑭᐅᖅᑕᖅᑐᒥ ᐃᑲᓗᒐᓱᒃᑐᑦ, ᐳᓚᕋᑦᑐᑦ ᐊᒻᒪᓗ ᑕᐅᖅᓰᔪᑦ ᑲᒻᐸᓂᑦ.

ᑕᐃᒪᖓᓂ ᐊᓂᒍᖅᑐᑦ ᐊᕙᑎᑦ ᐅᑭᐅᑦ ᕼᐋᒻᓚᒃᑯᑦ, ᕿᑭᖅᑖᓗᒃ ᑯᐊᐳᕆᓴᓐ, ᐊᒻᒪᓗ ᑎᐅᓕᑐᐊᓕᔅ ᐊᒻᒪᓗ ᒐᕙᑐᖃᒃᑯᑦ ᐊᑐᓂ ᐃᓕᓴᖅᓯᓯᒪᔪᑦ ᐱᑕᖃᕆᐊᖃᕐᓂᖓᓂ ᐊᒻᒪᓗ ᐱᕕᖃᕐᑎᑦᑎᔪᓐᓇᕐᓂᖓ ᑭᓴᕐᕕᒃ ᕿᑭᖅᑕᕐᔪᐊᕐᒥ ᐊᒻᒪᓗ ᐊᑐᓂ ᐱᕙᓪᓕᐊᑎᐊᖅᑐᖅ ᖃᓄᕆᑦᑐᑐᐃᓐᓇᐃᑦ ᑲᔪᓯᔪᓐᓇᕐᒪᖔᑕ ᑲᔪᓯᔪᓐᓇᓐᖏᒻᒪᖔᑕ ᐃᓕᑕᐅᓇᓱᒃᓯᒪᔪᑦ ᐊᒻᒪᓗ ᖃᐅᔨᓇᓱᒃᑕᐅᑦᑎᐊᖅᓯᒪᔪᑦ.

ᒫᓐᓇᓵᖑᔪᖅ, ᕿᑭᖅᑖᓗᑦ ᓇᖕᒥᓂᖁᑎᓕᖕᓄᑦ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕆᓴᓐ ᐊᒻᒪᓗ ᕼᐋᒻᓚᒃᑯᑦ ᓯᕗᓪᓕᖅᐹᖑᓚᐅᖅᑐᑦ ᐱᕙᓪᓕᐊᑎᑦᑎᓪᓗᑎᒃ ᑕᒪᐃᓐᓄᑦ ᑮᓇᐅᔭᒃᓴᓂᒃ ᑐᒃᓯᕋᐅᑎᓂᒃ ᖃᓄᖅ ᐋᕿᒃᓯᒪᔾᔪᑎᒋᓂᐊᖅᑕᖓᓄᑦ ᐊᒻᒪᓗ ᓇᑉᐸᖅᑕᐅᓂᐊᕐᓂᖓᓄᑦ 90 ᒦᑕ ᐃᒃᓴᕐᕕᒃ ᐊᒻᒪᓗ ᐊᑕᔪᑦ ᑖᔅᓱᒧᖓ ᓇᕐᐸᕆᐊᓕᑦ ᕿᑭᖅᑕᕐᔪᐊᕐᒥ.