ᓴᐳᑎ ᓴᓇᔭᐅᒋᐊᕐᓂᖓ ᐊᖏᓪᓕᒋᐊᖅᑕᐅᓂᖓᓗ

ᓴᐳᑎ ᑕᑎᑦᓴᐅᖏᓐᓇᖃᑦᑕᕐᓯᒪᑎᓪᓗᒍ ᐅᑭᐅᕋᓵᓗᓐᓂᒃ, ᐅᓄᕐᓯᑲᓐᓂᖁᓪᓗᒋᑦ ᐅᓯᖃᑦᑕᖅᑕᖏᑦ, ᕿᑭᖅᑖᓗᒃ ᐃᖃᓗᓕᕆᓂᕐᒧᑦ ᑯᐊᐳᕇᓴᒃᑯᑦ ᐋᖅᑭᒋᐊᕆᓚᐅᖅᑐᑦ ᐅᒥᐊᕐᔪᐊᒥᓂᒃ 2012-ᒥ. 1987-ᒥ ᓴᓇᔭᐅᒋᐊᓐᖓᓚᐅᖅᑐᖅ, ᑕᑭᓪᓕᒋᐊᖅᑕᐅᓚᐅᖅᑐᖅ 12 ᒦᑕᓂᒃ ᐊᒻᒪᓗ ᒫᓐᓇ ᑕᑭᓂᖃᓕᖅᑐᖅ 76-ᒐᓚᓐᓂᒃ (250 ᐃᑎᒐᑦ). ᐅᓯᒍᓐᓇᖅᑕᖏᑦ ᐅᓄᕐᓯᒋᐊᕐᓯᒪᔪᑦ 1,700 ᑭᑉᐹᕆᑦᑐᑦ ᒦᑕ ᐊᖏᓂᖓᒍᑦ, ᑐᑭᓕᒃ ᐅᒥᐊᕐᔪᐊᖅ ᐅᓯᒍᓐᓇᓕᖅᑐᖅ 900 ᒥᑐᕆᒃ ᑕᓐ ᐅᖁᒪᐃᓐᓂᕐᓂᒃ ᖃᓕᕋᓕᓐᓂᒃ (ᐊᑯᑭᑦᑐᒥᐅᑦ ᖃᓕᕋᓕᑦᓴᔭᖏᓐᓂᒃ) ᐅᕝᕙᓘᓐᓃᑦ 650 ᒥᑐᕆᒃ ᑕᓐ ᐅᖁᒪᐃᓐᓂᕐᓂᒃ ᐅᑭᐅᖅᑕᖅᑐᒥ ᑭᖑᑉᐸᖕᓂᒃ.

ᖁᐊᒃᑯᕕᓪᓗᐊᑕᖓᑕ ᐊᐅᓚᑦᓯᒍᑎᖓ ᐊᓯᔾᔨᖅᑕᐅᓚᐅᕐᒥᔪᖅ ᐅᑦᓯᕕᖓᓃᑦᑐᖅ, ᑕᓪᓕᒪᓂᒃ ᖁᐊᒃᑯᕕᓕᒃ ᐊᒻᒪᓗ ᖁᐊᖅᑎᑦᓯᒍᓐᓇᖅᑐᖅ 50 ᑕᓐ ᐅᖁᒪᐃᓐᓂᕐᓂᒃ ᐆᒪᔪᖅᑕᒥᓂᒃ ᖃᐅᑕᒫᑦ. ᖁᐊᒃᑯᕖᑦ ᒫᓐᓇ ᐊᕙᑎᒧᑦ ᓱᕈᐃᕙᓪᓕᐊᖏᓐᓂᕐᓴᑦ, ᐊᓯᔾᔨᖅᑕᐅᓚᐅᖅᑎᓪᓗᒍ ᑕᐃᔭᐅᔪᒥᒃ Freon ᐊᐅᓚᑦᓯᒍᑎᒥᒃ ᐳᓪᓚᑐᖅᑐᒧᑦ (Ammonia) ᐊᐅᓚᑦᓯᒍᑎᒧᑦ, ᓴᐳᑎ ᓯᕗᓪᓕᕐᐹᖑᓪᓗᓂ ᐅᒥᐊᕐᔪᐊᓂ ᐋᑦᓛᓐᑎᒃ ᑲᓇᑕᒥ ᐊᑐᖅᑕᐅᒋᐅᖅᑐᖅ ᐊᒻᒪᓗ ᑎᒍᓯᒍᑕᐅᓪᓗᓂ ᒫᓐᑐᕆᐊᒥ ᐊᖏᕈᑕᐅᓯᒪᔪᒥᒃ.

ᑭᖑᓪᓕᕐᐹᖅ ᐱᐅᓯᒋᐊᖅᑕᐅᒍᑎᒋᓚᐅᖅᑕᖓ ᐅᖃᐅᓯᒃᓴᖅ ᐃᒪᐅᑉ ᐃᑭᐊᖓᒍᑦ ᑲᓕᒐᒃᑯᑦ ᐃᖃᓗᒐᓲᑕᐅᒍᓐᓇᓕᖅᑐᖅ ᑭᑉᕙᐃᑎᖃᓕᕐᒪᑦ. ᑲᑎᑦᑐᒋᒃ, ᑕᒪᒃᑯᐊᓕᒫᑦ ᐱᐅᓯᒋᐊᖅᑕᐅᒍᑕᐅᓚᐅᖅᑐᑦ ᑐᑭᓖᑦ ᐅᒥᐊᕐᔪᐊᖅ ᑕᒪᒃᑮᓐᓂᒃ ᐅᓯᒍᓐᓇᓂᕐᓴᐅᓕᖅᑐᖅ ᑭᖑᑉᐸᓐᓂᒃ ᖃᓕᕋᓕᓐᓂᓪᓗ, ᐊᒻᒪᓗ ᐊᑯᓂᐅᓂᕐᓴᖅ ᐃᖃᓪᓕᐊᕐᓯᒪᖃᑦᑕᕈᓐᓇᓕᖅᑐᓂ. ᑕᒪᓐᓇ ᐱᖕᒪᕆᐅᔪᖅ ᐱᔾᔪᑎᒋᓪᓗᒍ ᓄᓇᕐᓂᑕᒫᑦ ᐅᒥᐊᕐᔪᐊᖅ ᑐᓚᑦᑕᕕᖕᓅᕋᐃᒻᒪᑦ ᑮᓇᐅᔭᐃᖏᓐᓇᕆᐊᖃᕐᒪᑦ, ᐊᒻᒪᓗ ᐊᐅᓪᓚᕐᓯᒪᖃᑦᑕᕈᓐᓇᕐᓂᖓ ᐊᑯᓂᐅᓂᕐᓴᖅ ᐊᒻᒪᓗ ᐱᕚᓪᓕᕈᑕᐅᓪᓗᓂ ᐊᑑᑎᖃᑦᓯᐊᕐᓂᖓ ᐊᑭᑭᓐᓂᕐᓴᐅᖃᑦᑕᓕᕐᓄᖓᓄᑦ ᕿᑭᖅᑖᓗᒃ ᐃᖃᓗᓕᕆᔨᒃᑯᑦ ᑯᐊᐳᕇᓴᒃᑯᑦ ᐊᑭᓕᕆᐊᓕᖏᓐᓄᑦ.

ᑕᐃᒪᓐᖓᓂᒃ ᓴᓇᒋᐊᖅᑕᐅᓚᐅᖅᑎᓪᓗᒍ ᐅᒥᐊᕐᔪᐊᕐᒥᐅᑦ ᓇᑯᕐᓴᖃᑦᑕᕐᓯᒪᔪᑦ ᐊᖏᔫᑕᐅᓂᕐᓴᐅᓕᕐᒪᑕ ᐃᓂᒋᕙᑦᑕᖏᑦ ᐱᕕᑐᓂᕐᓴᐅᓪᓗᓂᓗ, ᑕᓚᕖᓴᖃᖅᑐᓂ, ᐃᑭᐊᖅᑭᔾᔪᑎ, ᐃᒫᓃᑉᕕᒃ ᐆᓇᖅᑐᖅ ᐊᒻᒪᓗ ᐱᖃᐃᓕᓴᕐᕖᑦ, ᐅᑉᐱᕆᔭᐅᔪᖅ ᑕᒪᒃᑯᐊᓕᒫᑦ ᐃᑲᔫᑎᓂᖏᓐᓂᒃ ᖃᓄᐃᓐᖏᓯᐊᕐᓂᕐᒧᑦ ᐊᒻᒪᓗ ᐃᖅᑲᓇᐃᔭᖅᑏᑦ ᓄᖅᑲᑐᐃᓐᓇᖃᑦᑕᖏᓐᓂᖏᓐᓄᑦ.