ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᕐᓂᖅ ᓄᓘᔮᓐᓂ ᐱᓕᕆᐊᖅ

ᐊᑐᕋᑦᓴᖃᖅᑎᑦᓯᓂᒃᑯᑦ ᐋᖅᑭᐅᒪᔭᐅᓪᓗᓂ ᐊᐅᓚᑕᐅᓪᓗᓂᓗ ᓇᖕᒥᓂᖁᑎᒋᔭᖓᓄᑦ, ᕿᑭᖅᑕᓂ ᓴᓇᕕᓕᕆᓂᕐᒧᑦ ᑎᒥᖁᑖ (ᕿᑭᖅᑖᓗᒻᒥ ᓱᓇᒃᑯᑖᖃᖅᑎᑦᓯᔨᒃᑰᒋᐊᓐᖓᓚᐅᖅᑐᑦ), ᕿᑭᖅᑖᓗᒃ ᑯᐊᐳᕇᓴᒃᑯᑦ ᓯᕗᓕᖅᑎᐅᓕᖅᑐᑦ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒥᒃ ᐊᖏᔫᑎᓂᒃ ᐱᖁᑎᕐᔪᐊᓕᕆᓂᕐᒥᒃ ᐱᓕᕆᐊᓂᒃ. 2007-ᒥᓂᒃ, ᕿᑭᖅᑕᓂ ᓴᓇᕕᓕᕆᔨᒃᑯᑦ ᐃᖅᑲᓇᐃᔭᖅᑎᑦᓯᓯᒪᓕᖅᑐᑦ ᐅᖓᑖᓃᑦᑐᓂᒃ 400 ᓄᓘᔮᓐᓂ ᐱᓕᕆᐊᖑᔪᒥ, ᐱᖕᒪᕆᐅᓂᕐᐸᐅᖃᑕᐅᓕᖅᑐᑎᒃ ᓇᖕᒥᓂᕐᓱᖅᑐᓂ ᐃᖅᑲᓇᐃᔭᕐᕕᖕᓂ ᓄᓇᕗᒻᒥ. 80% ᐃᖅᑲᓇᐃᔭᖅᑎᖏᑦ ᐃᓅᓪᓗᑎᒃ ᐃᖅᑲᓇᐃᔭᖅᑎᑖᖑᓯᒪᔪᑦ ᑖᒃᑯᓇᓐᖔᕐᓯᒪᔪᓂᒃ ᕿᑭᖅᑕᓂ ᓄᓇᓕᖏᓐᓂᒃ.

ᐃᖅᑲᓇᐃᔮᑦᓴᐅᓚᐅᖅᑐᑦ ᐃᓚᒋᔭᐅᓪᓗᑎᒃ ᐅᖁᒪᐃᑦᑐᕐᓯᐅᑎᓕᕆᔩᑦ, ᐅᖁᒪᐃᑦᑐᕐᓂᐅᑎᓂᒃ ᐊᐅᓚᐅᓯᕆᔩᑦ, ᐅᐊᔭᓕᕆᔩᑦ, ᓱᓪᓗᓕᓕᕆᔩᑦ, ᕿᔪᓕᕆᔩᑦ, ᐃᑲᔪᖅᑏᑦ, ᓇᓄᕐᓂᒃ ᖃᐅᔨᓴᖅᑏᑦ, ᓴᓗᒻᒪᕐᓴᐃᔩᑦ, ᐋᓐᓂᐊᓯᐅᖅᑏᑦ, ᐃᖢᐊᕐᓴᐃᔩᑦ, ᓂᖅᑎᐅᖅᑏᑦ, ᓂᖅᑎᐅᖅᑎᓄᑦ ᐃᑲᔪᖅᑏᑦ, ᐃᑲᔪᖅᑏᑦ ᐊᐅᓚᑦᓯᔨᓄᑦ, ᐋᖅᑭᐅᒪᑦᓯᔩᑦ, ᐊᒻᒪᓗ ᐊᖓᔪᖅᑳᕆᔭᐅᔪᑦ.

2007-2008-ᒥ, ᐊᑐᕆᐊᓕᕆᔨᕗᑦ ᐃᑲᔪᓚᐅᖅᑐᑦ ᓴᓇᔭᐅᓂᖓᓂ ᒥᑉᕕᒃ, ᐅᖅᓱᖃᐅᑎᐊᓗᐃᑦ, ᑕᒻᒫᕐᓯᒪᕕᒃᓴᖅ ᐊᒻᒪᓗ ᐅᒥᐊᕐᔪᐊᒃᑰᖅᑐᓂᒃ ᐊᔾᔭᑐᕐᓂᖅ. ᐃᑳᕈᑎᓕᐅᓚᐅᖅᑐᑦ ᑰᑉᕕᓐᓂᒃ ᑰᒐᓛᓂ 100 ᑭᓛᒥᑕᓂᒃ ᐊᑐᕆᐊᒥᒃ ᑲᓲᒪᔪᒥᒃ ᕿᓐᖑᐊᓄᑦ ᓄᓘᔮᓐᓄᓪᓗ. ᐊᖅᑯᑎᓕᕆᔨᕗᑦ ᐊᖅᑯᑎᓂᒃ ᐋᖅᑭᐅᒪᑦᓯᑦᓯᐊᖏᓐᓇᓚᐅᖅᑐᑦ ᐊᐅᓚᕕᑦᓴᐅᑎᑦᓰᓇᖅᑐᑎᓪᓗ, ᐊᐳᑕᐃᔭᐃᕙᑦᑐᑎᒃ ᐅᑭᐅᒃᑯᑦ.

ᐸᔪᑦᑎᕆᔨᕗᑦ ᐸᔪᑦᑎᕆᖃᑦᑕᓕᖅᑐᑦ ᓄᖅᑲᓚᐅᕐᓯᒪᓇᑎᒃ, ᐊᕐᕌᒍᓕᒫᖅ, ᐱᖓᓱᓂᒃ ᐊᕐᕌᒎᖅᑲᐅᔪᓂᒃ ᓄᓘᔮᓐᓂ ᐱᓕᕆᐊᒧᑦ, ᐱᓕᕆᐊᒃᓴᒥᓂᒃ ᐋᖅᑭᐅᒪᑦᓯᓪᓗᑎᒃ ᐊᐅᓚᑦᓯᓪᓗᑎᓪᓗ ᐊᒥᓱᒐᓚᓐᓂ ᐱᓕᕆᕕᒋᔭᐅᔪᓄᑦ ᐊᑕᐅᑦᓯᒃᑯᑦ. ᐊᐅᔭᒃᑯᑦ, ᕿᑭᖅᑕᓂ ᓴᓇᕕᓕᕆᔨᒃᑯᑦ ᐸᔪᑦᑎᕆᔨᖏᑦ ᐸᕐᓇᐸᑦᑐᑦ ᓂᖅᑎᐅᖅᑐᑎᒃ ᑎᑭᐅᑎᓯᒪᔪᓂᒃ 30,000 ᓂᕆᔭᒃᓴᓂᒃ ᑕᖅᑭᑕᒫᑦ.