ᕿᑭᖅᑖᓗᒃ ᓇᒻᒥᓂᖁᑎᖏᑦ ᑎᒥᖓ

QPI

ᐱᓇᓱᐊᒐᖓ: ᐃᓂᑦᓴᖃᖅᑎᓯᑦᓯᐊᕐᓗᑎᒃ ᐊᑦᑕᓇᓐᖏᑦᑐᒥᒃ, ᐊᑦᑕᓇᐃᕐᓯᒪᑦᓯᐊᖅᑐᒥᒃ, ᐊᐅᓚᓂᖃᑦᓯᐊᖅᑐᒥᒃ ᐊᒻᒪᓗ ᐱᔪᒥᓇᖅᑐᒥᒃ ᐊᑐᖅᑐᐊᖅᑎᑕᑦᑎᓐᓄᑦ ᐊᖏᕐᕋᒥᒃ. ᕿᑭᖅᑖᓘᑉ ᓇᖕᒥᓂᖁᑎᖏᑦ ᑎᒥᖓ ᐊᖏᕐᕋᖃᖅᑎᑦᓯᕙᑦᑐᖅ, ᑮᓇᐅᔭᓕᐅᕋᓱᐊᕐᕕᒃᓴᓂᒃ ᐊᒻᒪᓗ ᓴᓇᕝᕕᔾᔪᐊᓂᒃ ᐊᑐᖅᑐᐊᑎᑦᓯᓂᕐᒥᒃ.

ᐄᑉᕈ 1, 2006-ᒥ, ᕿᑭᖅᑖᓗᒃ ᑯᐊᐳᕇᓴᒃᑯᑦ ᑲᑎᑦᓯᓚᐅᖅᑐᑦ ᑮᓇᐅᔭᓕᐅᕋᓱᐊᕈᑎᓕᒫᒥᓂᒃ ᐃᓪᓗᖁᑎᒋᔭᒥᓂᒃ ᓴᖅᑮᓪᓗᑎᒃ ᓄᑖᒥᒃ ᖃᐅᔨᒪᔭᐅᓂᓕᒻᒥᒃ ᕿᑭᖅᑖᓗᒃ ᓇᖕᒥᓂᖁᑎᖏᑦ ᑎᒥᖓ (QPI). ᑲᑎᑕᐅᓚᐅᖅᑐᑦ ᑖᒃᑯᐊᖑᓪᓗᑎᒃ ᕿᑭᖅᑖᓗᒃ ᑯᐊᐳᕇᓴᓐ ᓇᖕᒥᓂᖁᑎᖏᑦ, ᑲᑭᕙᒃ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᓐ ᐊᒻᒪᓗ ᐃᓪᓗᓕᐅᕐᕕᒃᓴᖅ 521 ᑮᓇᐅᔭᓕᐅᕋᓱᐊᖃᑎᒌᓐᓂᕐᒧᑦ ᑲᑐᔾᔨᖃᑎᒌᒍᑕᐅᔪᖅ ᑎᒥᖓ.

ᕿᑭᖅᑖᓗᒃ ᓇᖕᒥᓂᖁᑎᖏᑦ ᑎᒥᖓ ᓯᑕᒪᓪᓗᐊᑕᕐᓂᒃ ᐊᐅᓚᑦᓯᔪᖅ:

  1. ᐊᐅᓚᑦᓯᔩᑦ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᖏᕐᕋᕆᔭᐅᔪᓂᒃ ᐃᓪᓗᖁᑎᖏᓐᓂᒃ
  2. ᐊᐅᓚᑦᓯᔪᑦ ᓇᖕᒥᓂᖅ ᑮᓇᐅᔭᓕᐅᕋᓱᐊᕈᑎᒥᓂᒃ ᓴᓇᒡᕕᔾᔪᐊᓂᓪᓗ ᓇᖕᒥᓂᖁᑎᒥᓂᒃ
    1. ᐊᑐᖅᑐᐊᒃᑲᐃᔪᑦ
    2. ᓴᓗᒻᒪᕐᓴᐃᔨᖃᖅᑎᑦᓯᔪᑦ
  3. ᐊᐅᓚᑦᓯᔪᑦ ᐋᖅᑭᐅᒪᑦᓯᓪᓗᑎᓪᓗ ᑮᓇᐅᔭᓕᐅᕋᓱᐊᕈᑎᒥᓂᒃ ᐊᒻᒪᓗ ᐃᓪᓗᖁᑎᒥᓂᒃ
  4. ᓇᖕᒥᓂᖁᑎᒥᓂᒃ ᐱᕙᓪᓕᐊᑎᑦᓯᓂᖅ

ᕿᑭᖅᑖᓗᒃ ᓇᖕᒥᓂᖁᑎᖏᑦ ᑎᒥᖓ ᐅᓂᒃᑳᓕᐅᕐᓯᒪᔪᑦ 80% ᐃᓄᓐᓂᒃ ᐃᖅᑲᓇᐃᔭᖅᑎᑦᓯᓂᕐᒥᓂᒃ, ᐃᖅᑲᓇᐃᔭᖅᑎᖏᓪᓗ ᐃᖅᑲᓇᐃᔭᑯᑖᖃᑦᑕᕐᓂᖏᓐᓂᒃ ᓇᓗᓇᐃᕐᓯᓯᒪᔪᑦ. ᐃᓄᓐᓃᖔᖅᑐᓂᒃ ᐃᖅᑲᓇᐃᔭᖅᑎᓴᕐᓯᒍᓐᓇᖃᑦᑕᖅᑐᑦ ᐃᓕᓐᓂᐊᕐᓯᒪᔪᓂᒃ ᓇᖕᒥᓂᖁᑎᒋᔭᐅᔪᓂᒃ ᐊᐅᓚᑦᓯᒍᓐᓇᖅᑐᓂᒃ, ᐃᓪᓗᖁᑎᖃᕐᓂᖅ ᐋᖅᑭᐅᒪᑦᓯᖃᑦᑕᓂᕐᓗ ᐊᑦᓱᕈᓐᓇᐃᓇᖅᑐᑦ ᑭᓯᐊᓂ ᑐᓂᓯᒪᑦᓯᐊᓂᑦᑎᒍᑦ ᐊᖏᕐᓯᒪᓂᒃᑯᑦ ᐱᓕᖕᒪᒃᓴᐃᖃᑦᑕᓂᕐᒧᑦ ᓯᕗᒧᐊᒃᐸᓪᓕᐊᑎᑦᓯᓂᕐᒧᓪᓗ ᐊᔪᓐᖏᓂᕆᔭᐅᒋᐊᓕᓐᓂᒃ ᐃᖅᑲᓇᐃᔭᖅᑎᑖᑦᑎᓐᓂᒃ ᑲᔪᓯᒍᑕᐅᑦᓯᐊᖃᑦᑕᖅᑐᖅ.